[72] |72.68| Abhītarūpaṃ sīhaṃva garuḷaggaṃva pakkhinaṃ byagghasubhaṃva pavaraṃ abhijātaṃva kesariṃ. |72.69| Sikhiṃ tilokasaraṇaṃ aneñjaṃ aparājitaṃ nisinnaṃ maraṇānaggaṃ bhikkhusaṅghapurakkhataṃ. |72.70| Caṅkoṭake ṭhapetvāna anojaṃ pupphamuttamaṃ mahācaṅkoṭakeneva buddhaseṭṭhaṃ samokiriṃ. |72.71| Tena cittappasādena dipadinda narāsabha pattomhi acalaṃ ṭhānaṃ hitvā jayaparājayaṃ. |72.72| Ekattiṃse ito kappe yaṃ kammamakariṃ tadā duggatiṃ nābhijānāmi buddhapūjāyidaṃ phalaṃ. |72.73| Sampuṇṇe tiṃsakappamhi devabhūtisanāmakā sattaratanasampannā pañcāsuṃ cakkavattino. |72.74| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā pupphacaṅkoṭiyo thero imā gāthāyo abhāsitthāti. Pupphacaṅkoṭiyattherassa apadānaṃ samattaṃ. Uddānaṃ sakacittaṃ atho pupphi paccābhigamanena ca parappasādabhisado sucinti vatthadāyako. Ambadāyi ca sumano pupphacaṅkoṭiyopica gāthekasattati vuttā gaṇitā atthadassiti . Sakacittaniyavaggo sattamo. -----------