[83] |83.1| Candabhāgānadītīre anusotaṃ vajāmahaṃ nisinnaṃ samaṇaṃ disvā vippasannamanāvilaṃ. |83.2| Tassa cittaṃ pasādesī evaṃ cintesahaṃ tadā tārayissati tiṇṇoyaṃ dantoyaṃ damayissati. |83.3| Assāsissati assattho santo ca samayissati mocayissati mutto ca nibbāpessati nibbuto. |83.4| Evāhaṃ cintayitvāna siddhatthassa mahesino gahetvā timirapupphaṃ matthake okiriṃ tadā . |83.5| Añjaliṃ paggahetvāna katvā ca naṃ padakkhiṇaṃ vanditvā satthuno pāde pakkāmiṃ aparaṃ disaṃ. |83.6| Aciraṃ gatamattaṃ maṃ migarājā apīḷayi papātamanugacchanto tattheva papatiṃ ahaṃ. |83.7| Catunavute ito kappe yaṃ pupphamabhiropayiṃ duggatiṃ nābhijānāmi buddhapūjāyidaṃ phalaṃ. |83.8| Chappaññāsamhi kappamhi sattevāsuṃ mahārahā sattaratanasampannā cakkavattī mahabbalā. |83.9| Paṭisambhidā catasso vimokkhāpica aṭṭhime Chaḷabhiññā sacchikatā kataṃ buddhassa sāsananti. Itthaṃ sudaṃ āyasmā timirapupphiyo thero imā gāthāyo abhāsitthāti. Timirapupphiyattherassa apadānaṃ samattaṃ.