[131] |131.91| Suvaṇṇavaṇṇo bhagavā vipassī dakkhiṇāraho purakkhato sāvakehi ārāmā abhinikkhami. |131.92| Disvānahaṃ buddhaseṭṭhaṃ sabbaññutaṃ anāsavaṃ pasannacitto sumano gatamaggaṃ apūjayiṃ. |131.93| Tena cittappasādena dipadindassa tādino haṭṭho haṭṭhena cittena puna vandiṃ tathāgataṃ. |131.94| Ekanavute ito kappe yaṃ pupphamabhiropayiṃ duggatiṃ nābhijānāmi buddhapūjāyidaṃ phalaṃ. Itthaṃ sudaṃ āyasmā gandhapupphiyo thero imā gāthāyo abhāsitthāti. Gandhapupphiyattherassa apadānaṃ samattaṃ.