[133] |133.1| Padumuttaro nāma jino lokajeṭṭho narāsabho mahato janakāyassa deseti amataṃ padaṃ. |133.2| Tassāhaṃ vacanaṃ sutvā vācāsabhimudīritaṃ añjaliṃ paggahetvāna ekaggo āsahaṃ tadā. |133.3| Yathā samuddo udadhīnamaggo meru nagānaṃ pavaro siluccayo tatheva ye cittavasena vattare na buddhañāṇassa kalaṃ upenti te. |133.4| Dhammavidhiṃ ṭhapetvāna buddho kāruṇiko isi bhikkhusaṅghe nisīditvā imā gāthā abhāsatha. |133.5| Yo so ñāṇaṃ pakittesi buddhamhi lokanāyake kappānaṃ satasahassaṃ duggatiṃ so na gacchati. |133.6| Kilese jhāpayitvāna ekaggo susamāhito sobhito nāma nāmena hessati satthusāvako. |133.7| Kilesā jhāpitā mayhaṃ bhavā sabbe samūhatā tisso vijjā anuppattā kataṃ buddhassa sāsanaṃ. Itthaṃ sudaṃ āyasmā sobhito thero imā gāthāyo abhāsitthāti. Sobhittatherassa apadānaṃ samattaṃ.