[142] |142.66| Parodhako tadā āsiṃ paramānuparodhako pabbhāre seyyaṃ kappemi avidūre sikhisatthuno. |142.67| Sāyaṃ pātañca passāmi buddhaṃ lokagganāyakaṃ deyyadhammo ca me natthi dipadindassa tādino. |142.68| Piyālaphalamādāya agamaṃ buddhasantikaṃ paṭiggahesi bhagavā lokajeṭṭho narāsabho. |142.69| Tato paraṃ upādāya pavāri taṃ vināyakaṃ tena cittappasādena tattha kālaṃ kato ahaṃ. |142.70| Ekattiṃse ito kappe yaṃ phalaṃ adadiṃ ahaṃ duggatiṃ nābhijānāmi phaladānassidaṃ phalaṃ. Itthaṃ sudaṃ āyasmā phaladāyako thero imā gāthāyo abhāsitthāti. Phaladāyakattherassa apadānaṃ samattaṃ. Uddānaṃ sobhi sudassano ceva candano pupphachadano raho campakapupphī ca atthasandassakena ca. Ekaraṃsī sāladado dasamo phaladāyako gāthāyo sattati dve ca gaṇitāyo vibhāvihīti. Sobhitavaggo cuddasamo ---------------