[169] |169.33| Candabhāgānadītīre anusotaṃ vajāmahaṃ sayambhuṃ addasaṃ tattha sālarājaṃva phullitaṃ . |169.34| Pupphaṃ yudhikamādāya upagacchiṃ mahāmuniṃ pasannacitto sumano buddhassa abhiropayiṃ. |169.35| Catunavute ito kappe yaṃ pupphaṃ abhiropayiṃ duggatiṃ nābhijānāmi buddhapūjāyidaṃ phalaṃ. |169.36| Sattasaṭṭhimhito kappe eko sāmuddharo ahu sattaratanasampanno cakkavatti mahabbalo. |169.37| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā yudhikapupphiyo thero imā gāthāyo abhāsitthāti. Yudhikapupphiyattherassa apadānaṃ samattaṃ.