[308] |308.24| Namo te buddhavīratthu vippamuttosi sabbadhi byasanamhi anuppatto tassa me saraṇaṃ bhava. |308.25| Siddhattho tassa byākāsi loke appaṭipuggalo mahodadhisamo saṅgho appameyyo anuttaro. |308.26| Tattha tvaṃ viraje khette anantaphaladāyake saṅghe cittaṃ pasādehi suvījaṃ vāpi ropaya. |308.27| Idaṃ vatvāna sabbaññū lokajeṭṭho narāsabho mamevaṃ anusāsitvā vehāsatalamuggami . |308.28| Aciraṃ gatamattamhi sabbaññumhi narāsabhe maraṇaṃ samanuppatto tusitaṃ upapajjahaṃ. |308.29| Tadāhaṃ viraje khette anantaphaladāyake saṅghe cittaṃ pasādetvā kappaṃ saggamhi modahaṃ. |308.30| Catunavute ito kappe pasādamalabhiṃ tadā duggatiṃ nābhijānāmi pasādassa idaṃ phalaṃ. Itthaṃ sudaṃ āyasmā sampasādiko thero imā gāthāyo abhāsitthāti. Sampasādikattherassa apadānaṃ samattaṃ.