[337] |337.39| Vipassī nāma sambuddho lokajeṭṭho narāsabho khīṇāsavehi sahito saṅghārāme vasī tadā. |337.40| Ārāmadvārā nikkhamma vipassī lokanāyako saha satasahassehi aṭṭhakhīṇāsavehi so. |337.41| Ajinena nivatthohaṃ vākacīradharopi ca kusumbhodakamādāya sambuddhaṃ upasaṅkamiṃ. |337.42| Sakaṃ cittaṃ pasādetvā vedajāto katañjalī kusumbhodakamādāya buddhamabbhukiriṃ ahaṃ. |337.43| Tena kammena sambuddho jalajuttamanāmako mama kammaṃ pakittetvā agamā yena patthitaṃ. |337.44| Phussitā pañcasahassā yehi pūjesahaṃ jinaṃ aḍḍhateyyasahassehi devarajjamakārayiṃ. |337.45| Aḍḍhateyyasahassehi cakkavatti ahosahaṃ avasesena kammena arahattaṃ apāpuṇiṃ. |337.46| Devarājā yadāhosiṃ manujādhipati tadā taṃyeva nāmadheyyaṃ me phussito nāmahosahaṃ . |337.47| Devabhūtassa santassa athāpi mānusassa vā samantā byāmato mayhaṃ phussitaṃpi pavassati. Itthaṃ sudaṃ āyasmā phussitakammiyo thero imā gāthāyo abhāsitthāti. Phussitakammiyattherassa apadānaṃ samattaṃ.