[34] |34.17| Sobhito nāma nāmena ahosiṃ brāhmaṇo tadā purakkhato sasissehi ārāmaṃ agamāsahaṃ. |34.18| Bhagavā tamhi samaye bhikkhusaṅghapurakkhato ārāmadvārā nikkhamma aṭṭhāsi purisuttamo. |34.19| Tamaddasāsiṃ sambuddhaṃ dantaṃ dantapurakkhataṃ sakaṃ cittaṃ pasādetvā santhaviṃ lokanāyakaṃ. |34.20| Yekeci pādapā sabbe mahiyā te virūhare Buddhimanto tathā sattā ruhanti jinasāsane. |34.21| Satthavāhopi sabbaññū mahesī bahuke jane vipathā uddharitvāna pathaṃ ācikkhase tuvaṃ. |34.22| Danto dantapurakkhato jhāyī jhānaratehi ca ātāpipahitattehi upasantehi tādibhi. |34.23| Alaṅkato parisato puññañāṇehi sobhasi pabhā niddhāvate tuyhaṃ suriyodayano yathā. |34.24| Pasannacittaṃ disvāna mahesī padumuttaro bhikkhusaṅghe ṭhito satthā imā gāthā abhāsatha. |34.25| Yo so hāsaṃ janetvāna mamaṃ kittesi brāhmaṇo kappānaṃ satasahassaṃ devaloke ramissati. |34.26| Tusitāhi cavitvāna sukkamūlena codito gotamassa bhagavato sāsane pabbajissati. |34.27| Tuṭṭhahaṭṭhaṃ labhissati pabbajitvāna sāsane sāgato nāma nāmena hessati satthu sāvako. |34.28| Pabbajitvāna kāyena pāpakammaṃ vivajjayiṃ vacīduccaritaṃ hitvā ājīvaṃ parisodhayiṃ. |34.29| Evaṃ vihāramānohaṃ tejodhātūsu kovido sabbāsave pariññāya viharāmi anāsavo. Itthaṃ sudaṃ āyasmā sāgato thero imā gāthāyo abhāsitthāti. Sāgatattherassa apadānaṃ samattaṃ.