[37] |37.64| Atthadassī tu bhagavā sayambhū aparājito bhikkhusaṅghaparibyuḷho rathiyaṃ paṭipajjatha. |37.65| Sissehi samparivuto gharamhā abhinikkhamiṃ nikkhamitvānahaṃ tattha addasaṃ lokanāyakaṃ. |37.66| Abhivādetvāna sambuddhaṃ sire katvāna añjaliṃ sakaṃ cittaṃ pasādetvā santhaviṃ lokanāyakaṃ. |37.67| Yāvatā rūpino sattā arūpī vā asaññino sabbe te tava ñāṇamhi anto honti samogadhā . |37.68| Sukhumacchikena jālena udakaṃ yo parikkhipe ye keci udake pāṇā antojāle bhavanti te. |37.69| Yesañca cetanā atthi rūpino ca arūpino. Sabbe te tava ñāṇamhi anto honti samogadhā |37.70| samuddharasimaṃ lokaṃ andhakārasamākulaṃ. Tava dhammaṃ suṇitvāna kaṅkhāsotaṃ taranti te |37.71| avijjānivuto loko andhakārena otthaṭo. Tava ñāṇamhi jotante andhakārā padhaṃsitā |37.72| tuvaṃ cakkhusi sabbesaṃ mahātamavinūdano. Tava dhammaṃ suṇitvāna nibbāyissati bahujjano |37.73| putaraṃ pūrayitvāna madhuṃ khuddaṃ anelakaṃ. Ubhohatthehi paggayha apanesiṃ mahesino |37.74| paṭiggaṇhi mahāvīro subhakena mahāisi. Bhuñjitvā tañca sabbaññū vehāsaṃ nabhamuggami |37.75| antalikkhe ṭhito satthā atthadassī narāsabho. Mama cittaṃ pasādento imā gāthā abhāsatha |37.76| yenidaṃ thavitaṃ ñāṇaṃ buddhaseṭṭho ca thomito. Tena cittappasādena duggatiṃ so na gacchati |37.77| catusaṭṭhiñca khattuṃ so devarajjaṃ karissati. Padesarajjaṭṭhasataṃ vasudhaṃ āvasissati |37.78| pañceva satakkhattuñca cakkavatti bhavissati. Padesarajjaṃ asaṅkheyyaṃ mahiyā kārayissati |37.79| ajjhāyiko mantadharo tiṇṇaṃ vedāna pāragū. Gotamassa bhagavato sāsane pabbajissati |37.80| gambhīraṃ nipuṇaṃ atthaṃ ñāṇena vicinissati. Mogharājāti nāmena hessati satthusāvako |37.81| tīhi vijjāhi sampanno katakicco anāsavo. Gotamo satthavāhaggo etadagge ṭhapessati |37.82| hitvā mānusakaṃ yogaṃ chetvāna bhavabandhanaṃ sabbāsave pariññāya viharāmi anāsavo. |37.83| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā mogharājā thero imā gāthāyo abhāsitthāti. Mogharājattherassa apadānaṃ samattaṃ.