[40] |40.94| Nibbute lokanāthamhi sikhimhi vadataṃ vare haṭṭho haṭṭhena cittena avandiṃ thūpamuttamaṃ. |40.95| Vaḍḍhakīhi kathāpetvā mūlaṃ datvānahaṃ tadā haṭṭho haṭṭhena cittena āyātaṃ kārayesahaṃ . |40.96| Aṭṭhakappāni devesu avokiṇṇaṃ vasiṃ ahaṃ avasesesu kappesu vokiṇṇaṃ saṃsariṃ ahaṃ. |40.97| Kāye visaṃ na kamati satthāni na ca hanti me udakehaṃ na mareyyāmi āyātassa idaṃ phalaṃ. |40.98| Yadicchāmi ahaṃ vassaṃ mahāmegho pavassati devāpi me vasaṃ enti puññakammassidaṃ phalaṃ. |40.99| Sattaratanasampanno tiṃsakkhattuṃ ahosahaṃ na maṃ kecāvajānanti puññakammassidaṃ phalaṃ. |40.100| Ekattiṃse ito kappe āyātaṃ yaṃ akārayiṃ duggatiṃ nābhijānāmi āyātassa idaṃ phalaṃ. |40.101| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā āyātadāyako thero imā gāthāyo abhāsitthāti. Āyātadāyakattherassa apadānaṃ samattaṃ.