[50] |50.93| Atthadassissa munino lokajeṭṭhassa tādino iṭṭhakāhi cinitvāna caṅkamaṃ kārayiṃ ahaṃ. |50.94| Uccato pañcaratanaṃ caṅkamaṃ sādhu māpitaṃ āyāmato hatthasataṃ bhāvaneyyaṃ manoramaṃ. |50.95| Paṭiggahesi bhagavā atthadassī naruttamo hatthena puḷinaṃ gayha imā gāthā abhāsatha. |50.96| Iminā puḷinadānena caṅkamaṃ sukatena ca sattaratanasampannaṃ puḷinaṃ anubhossati. |50.97| Tīṇi kappāni devesu devarajjaṃ karissati anubhossati sampattiṃ accharāhi purakkhato. Itthaṃ sudaṃ āyasmā caṅkamadāyako thero imā gāthāyo abhāsitthāti. Caṅkamadāyakattherassa apadānaṃ samattaṃ.