[57] |57.33| Padumuttarabuddhassa ājānīyaṃ adāsahaṃ niyyādetvāna sambuddhe agamāsiṃ sakaṃ gharaṃ. |57.34| Devilo nāma nāmena satthuno aggasāvako varadhammassa dāyādo āgañchi mama santikaṃ. |57.35| Sabbatthahāro bhagavā ājāneyyo na kampati tava saṅkappamaññāya adhivāsesi cakkhumā. |57.36| Agghāpetvā vātajavaṃ sindhavaṃ sīghavāhanaṃ padumuttarabuddhassa khamanīyaṃ adāsahaṃ. |57.37| Yaṃ yaṃ yonūpapajjāmi devattaṃ atha mānusaṃ ājānīyā vātajavā vitti nibbattare mama . |57.38| Lābhā tesaṃ suladdhaṃ vā ye labhantupasampadaṃ punappayirupāseyyaṃ buddho loke sace bhave. |57.39| Aṭṭhavīsatikkhattāhaṃ rājā āsiṃ mahabbalo cāturanto vijitāvī jambūdīpassa issaro. |57.40| Imaṃ pacchimakaṃ mayhaṃ carimo vattate bhavo pattomhi acalaṃ ṭhānaṃ hitvā jayaparājayaṃ. |57.41| Catuttiṃse sahassamhi mahātejosi khattiyo sattaratanasampanno cakkavatti mahabbalo. Itthaṃ sudaṃ āyasmā opavuyho thero imā gāthāyo abhāsitthāti. Opavuyhattherassa apadānaṃ samattaṃ.