[63] |63.1| Pavanaṃ kānanaṃ disvā appasaddaṃ anāvilaṃ isīnaṃ anuciṇṇaṃva āhutīnaṃ paṭiggahaṃ. |63.2| Thūpaṃ katvāna veḷinaṃ nānāpupphaṃ samokiriṃ sammukhā viya sambuddhaṃ nimmitaṃ abhivandahaṃ. |63.3| Sattaratanasampanno rājā raṭṭhasmi issaro sakakammābhiraddhohaṃ pupphapūjāyidaṃ phalaṃ. |63.4| Ekanavute ito kappe yaṃ pupphamabhiropayiṃ duggatiṃ nābhijānāmi buddhapūjāyidaṃ phalaṃ. |63.5| Asītikappenantayaso cakkavatti ahosahaṃ sattaratanasampanno catudīpamhi issaro. |63.6| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā sakacittaniyo thero imā gāthāyo abhāsitthāti. Sakacittaniyattherassa apadānaṃ samattaṃ.