[70] |70.53| Anomadassī bhagavā nisinno pabbatantare mettāya aphari loke appamāṇe nirūpadhi. |70.54| Kapi ahaṃ tadā āsiṃ himavante naguttame disvā anomamadhikaṃ buddhe cittaṃ pasādayiṃ. |70.55| Avidūre himavantassa ambāsuṃ phalino tadā tato pakkaṃ gahetvāna ambaṃ samadhukaṃ adaṃ. |70.56| Tamme buddho viyākāsi anomadassī mahāmuni iminā madhudānena ambapānena cūbhayaṃ. |70.57| Sattapaññāsakappāni devaloke ramissati avasesesu kappesu vokiṇṇaṃ saṃsarissati. |70.58| Khepetvā pāpakaṃ kammaṃ paripakkāya vuddhiyā vinipātādihāgantvā kilese jhāpayissati. |70.59| Damena uttamenāhaṃ damitomhi mahesinā pattomhi acalaṃ ṭhānaṃ hitvā jayaparājayaṃ. |70.60| Sattasattatikappasate ambaṭṭhajayanāmakā catuddasā te rājāno cakkavattī mahabbalā. |70.61| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā ambadāyako thero imā gāthāyo abhāsitthāti. Ambadāyakattherassa apadānaṃ samattaṃ.