[73] |73.1| Āpāṭaliṃ ahaṃ pupphaṃ ujjhitaṃ sumahāpathe thūpamhi abhiropesiṃ sikhino lokabandhuno. |73.2| Ekattiṃse ito kappe yaṃ kammamakariṃ tadā duggatiṃ nābhijānāmi thūpapūjāyidaṃ phalaṃ. |73.3| Ito paṇṇarase kappe pupphiyo nāma khattiyo sattaratanasampanno cakkavatti mahabbalo. |73.4| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā nāgasamālo thero imā gāthāyo abhāsitthāti. Nāgasamālattherassa apadānaṃ samattaṃ.