[77] |77.18| Khaṇḍo nāmāsi nāmena vipassissaggasāvako ekā bhikkhā mayā dinnā lokāhutipaṭiggaho . |77.19| Tena cittappasādena dipadinda narāsabha duggatiṃ nābhijānāmi ekabhikkhāyidaṃ phalaṃ. |77.20| Cattāḷīse ito kappe varuṇo nāma khattiyo sattaratanasampanno cakkavatti mahabbalo. |77.21| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā ekasaññako thero imā gāthāyo abhāsitthāti. Ekasaññakattherassa apadānaṃ samattaṃ.