[92] |92.51| Pokkharavanaṃ paviṭṭho bhañjanto padumānahaṃ addasaṃ phussasambuddhaṃ dvattiṃsavaralakkhaṇaṃ. |92.52| Padumapupphaṃ gahetvāna ākāse ukkhipiṃ ahaṃ pāpakammaṃ saritvāna pabbajiṃ anagāriyaṃ. |92.53| Pabbajitvāna kāyena manasā saṃvutena ca vacīduccaritaṃ hitvā ājīvaṃ parisodhayiṃ. |92.54| Dvenavute ito kappe yaṃ pupphamabhiropayiṃ duggatiṃ nābhijānāmi buddhapūjāyidaṃ phalaṃ. |92.55| Padumabhāsanāmāva aṭṭhārasa mahīpatī aṭṭhārasesu kappesu aṭṭhatāḷīsamāsiṃsu. Itthaṃ sudaṃ āyasmā padumapupphiyo thero imā gāthāyo abhāsitthāti. Padumapupphiyattherassa apadānaṃ samattaṃ. Uddānaṃ timiraṃ naṅgalipupphī nipannañjaliko adho dve raṃsisaññi phalado saddasaññī ca secako padumapupphī ca gāthāyo chapaññāsā pakittitā. Timirapupphiyavaggo navamo. ----------