[129] |129.296| Padumuttaro nāma jino sabbalokavidū muni ito satasahassamhi kappe uppajji cakkhumā. |129.297| Ovādako viññāpako tārako sabbapāṇinaṃ desanākusalo buddho tāresi janataṃ bahuṃ. |129.298| Anukampako kāruṇiko hitesī sabbapāṇinaṃ sampatte titthiye sabbe pañcasīle patiṭṭhahi. |129.299| Evaṃ nirākulaṃ āsi suññataṃ titthiyehi ca vicittaṃ arahantehi vasībhūtehi tādibhi. |129.300| Ratanānaṭṭhapaññāsaṃ uggato so mahāmuni kañcanagghiyasaṅkāso dvattiṃsavaralakkhaṇo. |129.301| Vassasatasahassāni āyu vijjata tāvade tāvatā tiṭṭhamāno so tāresi janataṃ bahuṃ. |129.302| Tadāhaṃ haṃsavatiyā brāhmaṇo mantapāragū upecca taṃ naravaraṃ assosiṃ dhammadesanaṃ. |129.303| Paññāpentaṃ mahāvīraṃ parisāsu visāradaṃ paṭibhāṇeyyakaṃ bhikkhuṃ etadagge vināyakaṃ. |129.304| Tadāhaṃ kāraṃ katvāna sasaṅghe lokanāyake nipacca sirasā pāde taṇṭhānaṃ abhipatthayiṃ. |129.305| Tato maṃ bhagavā āha siṅginikkhasamappabho sarena rajanīyena kilesamalahārinā. |129.306| Sukhī bhavassu dīghāyu sijjhataṃ paṇidhī tava sasaṅghe me kataṃ kāraṃ atīva vipulaṃ tayā. |129.307| Satasahasse ito kappe okkākakulasambhavo gotamo nāma nāmena satthā loke bhavissati. |129.308| Tassa dhammesu dāyādo oraso dhammanimmito rādhoti nāmadheyyena hessati satthu sāvako. [1]- |129.309| Paṭibhāṇeyyakānaggaṃ paññāpessati nāyako taṃ sutvā mudito hutvā yāvajīvaṃ tadā jinaṃ. |129.310| Mettacitto paricariṃ yato paññāsamāhito tena kammena sukatena cetanāpaṇidhīhi ca. |129.311| Jahitvā mānusaṃ dehaṃ tāvatiṃsaṃ agañchahaṃ satānaṃ tīṇikkhattuñca devarajjamakārayiṃ. |129.312| Satānaṃ pañcakkhattuñca cakkavatti ahosahaṃ padesarajjaṃ vipulaṃ gaṇanāto asaṅkhayaṃ. |129.313| Sabbattha sukhito āsiṃ tassa kammassa vāhasā pacchime bhavasampatte giribbajapuruttame. |129.314| Jāto vippakule niddhe vikalacchādanāsane kaṭacchubhikkhaṃ pādāsiṃ sārīputtassa tādino. Itthaṃ sudaṃ āyasmā rādho thero imā gāthāyo abhāsitthāti. Rādhattherassa apadānaṃ samattaṃ.