[130] |130.326| Padumuttaro lokavidū sabbalokahito muni ito satasahassamhi kappe uppajji cakkhumā. |130.327| Ovādako viññāpako tārako sabbapāṇinaṃ desanākusalo buddho tāresi janataṃ bahuṃ. |130.328| Anukampako kāruṇiko hitesī sabbapāṇinaṃ sampatte titthiye sabbe pañcasīle patiṭṭhahi. |130.329| Evaṃ nirākulaṃ āsi suññataṃ titthiyehi ca vicittaṃ arahantehi vasībhūtehi tādibhi. |130.330| Ratanānaṭṭhapaññāsaṃ uggato so mahāmuni kañcanagghiyasaṅkāso battiṃsavaralakkhaṇo. |130.331| Vassasatasahassāni āyu vijjati tāvade tāvatā tiṭṭhamāno so tāresi janataṃ bahuṃ. Itthaṃ sudaṃ āyasmā mogharājā thero imā gāthāyo abhāsitthāti. Mogharājattherassa apadānaṃ samattaṃ. Uddānaṃ kaccāno vakkalī thero mahākappinasavhayo dabbo kumāranāmo ca bāhiyo koṭṭhiko vasī. Uruvelakassapo rādho mogharājā ca paṇḍito tīṇi gāthāsatānettha dvāsaṭṭhi ceva piṇḍitā. Kaccāyanavaggo catupaññāso. ---------------------