[135] |135.143| Padumuttaro nāma jino sabbadhammesu cakkhumā ito satasahassamhi kappe uppajji nāyako. |135.144| Hitāya sabbasattānaṃ sukhāya vadataṃ varo atthāya purisājañño paṭipanno sadevake. |135.145| Yasaggapatto sirimā kittivaṇṇabhaṭo jino pūjito sabbalokassa disā sabbā suvissuto. |135.146| Uttiṇṇavicikiccho so vītivattakathaṃkatho paripuṇṇamanasaṅkappo patto sambodhimuttamaṃ. |135.147| Anuppannassa maggassa uppādetā naruttamo anakkhātañca akkhāsi asañjātañca sañjanī. |135.148| Maggaññū maggavidū ca maggakkhāyī narāsabho maggassa kusalo satthā sārathīnaṃ naruttamo. |135.149| Tadā mahākāruṇiko dhammaṃ desesi nāyako nimugge mohapaṅkamhi samuddharati pāṇino. |135.150| Bhikkhunīnaṃ ovadane sāvakaṃ jeṭṭhasammataṃ vaṇṇayaṃ etadaggamhi paññāpesi mahāmuni. |135.151| Taṃ sutvāhaṃ pamudito nimantetvā tathāgataṃ bhojayitvā sasaṅghantaṃ patthayiṃ ṭhānamuttamaṃ. |135.152| Tadā pamudito nātho maṃ avoca mahāisi sukhī bhavassu dīghāyu lacchasetaṃ manorathaṃ. |135.153| Satasahasse ito kappe okkākakulasambhavo gotamo nāma nāmena satthā loke bhavissati. |135.154| Tassa dhammesu dāyādo oraso dhammanimmito nandako nāma nāmena hessati satthusāvako. |135.155| Tena kammena sukatena cetanāpaṇidhīhi ca jahitvā mānusaṃ dehaṃ tāvatiṃsaṃ agañchahaṃ. |135.156| Pacchime ca bhave dāni jāto seṭṭhikule ahaṃ sāvatthiyaṃ puravare iddhe phīte mahaddhane. |135.157| Purappavese sugataṃ disvā vimhitamānaso jetārāmapaṭiggāhe pabbajiṃ anagāriyaṃ. Itthaṃ sudaṃ āyasmā nandako thero imā gāthāyo abhāsitthāti. Nandakattherassa apadānaṃ samattaṃ.