[173] |173.56| Nagare aruṇavatiyā aruṇo nāma khattiyo tassa rañño ahaṃ bhariyā ekaccaṃ vādayāmahaṃ. |173.57| Rahogatā nisīditvā evaṃ cintesahaṃ tadā kusalaṃ me kataṃ natthi ādāya gamiyaṃ mama. |173.58| Mahābhitāpaṃ kaṭukaṃ ghorarūpaṃ sudāruṇaṃ nirayaṃ nūna gacchāmi ettha me natthi saṃsayo. |173.59| Evāhaṃ cintayitvāna pahaṃsetvāna mānasaṃ rājānaṃ upagantvāna idaṃ vacanamabraviṃ. |173.60| Itthī nāma mayaṃ deva purisā na bhavāma no ekaṃ me samaṇaṃ dehi bhojayissāmi khattiya. |173.61| Adāsi me tadā rājā samaṇaṃ bhāvitindriyaṃ tassa pattaṃ gahetvāna paramannena pūrayiṃ. Po. Yu. purisāna bharā mayaṃ. |173.62| Pūretvā paramaṃ annaṃ saha sugandhalepanaṃ mahācelena chādetvā adāsiṃ tuṭṭhamānasā. |173.63| Tena kammena sukatena cetanāpaṇidhīhi ca jahitvā mānusaṃ dehaṃ tāvatiṃsaṃ agañchahaṃ. |173.64| Sahassadevarājūnaṃ mahesittamakārayiṃ sahassacakkavattīnaṃ mahesittamakārayiṃ. |173.65| Padesarajjaṃ vipulaṃ gaṇanāto asaṅkhayaṃ nānāvidhaṃ bahuṃ aññaṃ tassa kammaphalaṃ tato. |173.66| Uppalasseva me vaṇṇo abhirūpā sudassanā itthī sabbaṅgasampannā abhijātā jutindharā. |173.67| Pacchime bhavasampatte ajāyiṃ sākiye kule nārīsahassapāmokkhā suddhodanasutassahaṃ. |173.68| Nibbinditvā agārehaṃ pabbajiṃ anagāriyaṃ sattamīrattimappattā catusaccaṃ apāpuṇiṃ. |173.69| Cīvaraṃ piṇḍapātañca paccayaṃ sayanāsanaṃ parimetuṃ na sakkomi piṇḍapātassidaṃ phalaṃ. |173.70| Yaṃ mayhaṃ purimaṃ kammaṃ kusalaṃ sarase muni tuyhatthāya mahāvīra paricattaṃ bahuṃ mayā . |173.71| Ekattiṃse ito kappe yaṃ dānamadadiṃ tadā duggatiṃ nābhijānāmi piṇḍapātassidaṃ phalaṃ. Itthaṃ sudaṃ uppaladāyikā bhikkhunī bhagavato sammukhā imā gāthāyo abhāsitthāti. Uppaladāyikātheriyā apadānaṃ samattaṃ.