[25] |25.1| Konāgamanassa aparena sambuddho dipaduttamo kassapo nāma nāmena dhammarājā pabhaṅkaro. Sa chaḍḍitaṃ kulamūlaṃ bahūnaṃ pāṇapūjitaṃ |25.2| datvāna dāyake dānaṃ pūrayitvāna mānasaṃ usabhovāḷakaṃ bhetvā patto sambodhimuttamaṃ. |25.3| Dhammacakkaṃ pavattente kassape lokanāyake vīsatikoṭisahassānaṃ paṭhamābhisamayo ahu. |25.4| Catumāsaṃ yadā buddho loke carati cārikaṃ dasakoṭisahassānaṃ dutiyābhisamayo ahu. |25.5| Yamakaṃ vikubbanaṃ katvā ñāṇadhātuṃ pakittayi pañcakoṭisahassānaṃ tatiyābhisamayo ahu. |25.6| Sudhammadevapure ramme tattha dhammaṃ pakittayi tīṇi koṭisahassāni devānaṃ bodhayī jino. |25.7| Naradevassa yakkhassa apare ca dhammadesane etesānaṃ abhisamayo gaṇanāto asaṅkhiyo . |25.8| Tassāpi devadevassa eko āsi samāgamo khīṇāsavānaṃ vimalānaṃ santacittāna tādinaṃ. |25.9| Vīsatibhikkhusahassānaṃ tadā āsi samāgamo abhikkantabhavantānaṃ hirisīlena tādinaṃ. |25.10| Ahaṃ tadā māṇavako jotipāloti vissuto ajjhāyiko mantadharo tiṇṇaṃ vedāna pāragū. Kassapabuddhavaṃso catuvīsatimo.