[13] |13.20| Punāparaṃ yadā homi campeyyako mahiddhiko tadāpi dhammiko āsiṃ sīlabbatasamappito. |13.21| Tadāpi maṃ dhammacāriṃ upavuṭṭhaṃ uposathaṃ ahituṇḍiko gahetvāna rājadvāramhi kīḷati. |13.22| Yaṃ so vaṇṇaṃ cintayati nīlaṃ va pītalohitaṃ tassa cittānuvattento homi cintitasannibho. |13.23| Thalaṃ kareyyaṃ udakaṃ udakampi thalaṃ kare yadihantassa kuppeyyaṃ khaṇena chārikaṃ kare. |13.24| Yadi cittavasī hessaṃ parihāyissāmi sīlato sīlena parihīnassa uttamattho na sijjhati. Campeyyacariyaṃ tatiyaṃ.