[21] |21.1| Yadāhaṃ amitayaso rājaputto yudhañjayo ussāvabinduṃ suriyātape patitaṃ disvāna saṃvijiṃ. |21.2| Tamevādhipatiṃ katvā saṃvegamānubrūhayiṃ mātupituñca vanditvā pabbajjamanuyācihaṃ. |21.3| Yācanti maṃ pañjalikā sanegamā saraṭṭhakā ajjeva putta paṭipajja iddhaṃ phītaṃ mahāmahiṃ. |21.4| Sarājake saorodhe sanegame saraṭṭhake karuṇaṃ paridevante anapekkho pariccajiṃ. |21.5| Kevalaṃ paṭhavīrajjaṃ ñātiparijanaṃ yasaṃ cajamāno na cintesiṃ bodhiyāyeva kāraṇā. |21.6| Mātā pitā na me dessā napi me dessā mahāyasā sabbaññutaṃ piyaṃ mayhaṃ tasmā rajjaṃ pariccajinti. Yudhañjayacariyaṃ paṭhamaṃ.