[31] |31.1| Kakusandho mahāvīro sabbadhammāna pāragū gaṇamhā vūpakaṭṭho so agamāsi vanantaraṃ. |31.2| Vījavījaṃ gahetvāna latāya ācariṃ ahaṃ bhagavā tamhi samaye jhāyate pabbatantare. |31.3| Disvānāhaṃ devadevaṃ vippasannena cetasā dakkhiṇeyyassa dhīrassa vījavījamadāsahaṃ. |31.4| Imasmiṃyeva kappasmiṃ yaṃ vījamadadiṃ tadā duggatiṃ nābhijānāmi vījavījassidaṃ phalaṃ. |31.5| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |31.6| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |31.7| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā vibhedakabījiyo thero imā gāthāyo abhāsitthāti. Vibhedakabījiyattherassa apadānaṃ samattaṃ.