[85] |85.31| Padumuttarabhagavato sujāto nāma sāvako paṃsukūlaṃ gavesanto saṅkāre rathiyā tadā. |85.32| Nagare haṃsavatiyā paresaṃ bhatiko ahaṃ upaḍḍhadussaṃ datvāna sirasā abhivādayiṃ. |85.33| Tena kammena sukatena cetanāpaṇidhīhi ca jahitvā mānusaṃ dehaṃ tāvatiṃsaṃ agañchahaṃ. |85.34| Tettiṃsakkhattuṃ devindo devarajjamakārayiṃ sattasattatikhattuñca cakkavatti ahosahaṃ. |85.35| Padesarajjaṃ vipulaṃ gaṇanāto asaṅkhayaṃ upaḍḍhadussadānena modāmi akutobhayo. |85.36| Icchamāno ahaṃ ajja sakānanaṃ sapabbataṃ khomadussehi chādeyyaṃ aḍḍhadussassidaṃ phalaṃ. |85.37| Satasahasse ito kappe yaṃ dānamadadiṃ tadā duggatiṃ nābhijānāmi aḍḍhadussassidaṃ phalaṃ. |85.38| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |85.39| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. Itthaṃ sudaṃ āyasmā upaḍḍhadussadāyako thero imā gāthāyo abhāsitthāti. Upaḍḍhadussadāyakattherassa apadānaṃ samattaṃ.