[133] |133.54| Padumuttaro nāma jino sabbadhammesu cakkhumā ito satasahassamhi kappe uppajji nāyako. |133.55| Sīlantassa asaṅkheyyaṃ samādhi vajirūpamo asaṅkheyyaṃ ñāṇavaraṃ vimutti ca anopamā. |133.56| Manujāmarunāgānaṃ brahmānañca samāgame samaṇabrāhmaṇākiṇṇe dhammaṃ desesi nāyako. |133.57| Sasāvakaṃ mahālābhiṃ puññavantaṃ jutindharaṃ ṭhapesi etadaggamhi parisāsu visārado. |133.58| Tadāhaṃ khattiyo āsiṃ nagare haṃsasavhaye sutvā jinassa taṃ vākyaṃ sāvakassa guṇaṃ bahuṃ. |133.59| Nimantayitvā sattāhaṃ bhojayitvā sasāvakaṃ mahādānaṃ daditvāna taṃ ṭhānaṃ abhipatthayiṃ. |133.60| Tadā maṃ vinataṃ pāde disvāna purisāsabho sarena mahatā dhīro imaṃ vacanamabravi. |133.61| Tato jinassa vacanaṃ sotukāmā mahājanā devatā atha gandhabbā brahmāno ca mahiddhikā. |133.62| Samaṇabrāhmaṇā ceva namassiṃsu katañjalī namo te purisājañña namo te purisuttama. Itthaṃ sudaṃ āyasmā sīvalī thero imā gāthāyo abhāsitthāti. Sīvalittherassa apadānaṃ samattaṃ.