[141] |141.1| Bhagavati konāgamane saṅghārāmamhi nivesamhi sakhiyo tisso janiyo vihāradānaṃ adamhase . |141.2| Dasakkhattuṃ satakkhattuṃ [3]- satānaṃ ca satakkhattuṃ devesu upapajjimha ko vādo mānuse bhave. |141.3| Devesu mahiddhikā hutvā mānusakamhi ko vādo sattaratanassa mahesī itthīratanaṃ ahaṃ bhaviṃ. |141.4| Tattha sañcitaṃ kusalaṃ susamiddhakulappajā dhanañjānī ca khemā ca ahaṃpica tayo janā. |141.5| Ārāmaṃ sukataṃ katvā sabbāvayavamaṇḍitaṃ buddhappamukhasaṅghassa niyyādetvā pamoditā. |141.6| Yattha yatthūpapajjāmi tassa kammassa vāhasā devesu aggataṃ pattā manussesu tatheva ca. |141.7| Imasmiṃyeva kappasmiṃ brahmabandhu mahāyaso kassapo nāma nāmena uppajji vadataṃ varo. Itthaṃ sudaṃ sumedhā bhikkhunī imā gāthāyo abhāsitthāti. Sumedhātheriyā apadānaṃ samattaṃ.