[168] |168.315| Purakkhatā bhikkhunīhi satehi sahassehi sā mahiddhikā mahāpaññā sambuddhaṃ upasaṅkamiṃ. |168.316| Sambuddhaṃ abhivādetvā satthuno cakkalakkhaṇe nisinnā ekamantamhi idaṃ vacanamabraviṃ. |168.317| Aṭṭhasattativassāhaṃ pacchimā vattayi vayā pabbhāramhi anuppattā ārocemi mahāmuniṃ. |168.318| Paripakko vayo mayhaṃ parittaṃ mama jīvitaṃ pahāya vo gamissāmi kataṃ me saraṇamattano. |168.319| Vayamhi pacchime kāle maraṇaṃ uparuddhati ajja rattiṃ mahāvīra pāpuṇissāmi nibbutiṃ. |168.320| Natthi jāti jarā byādhi maraṇañca mahāmune ajarāmarābhayapuraṃ gamissāmi asaṅkhataṃ. |168.321| Yāvatā parisā nāma samupāsanti satthuno aparādhaṃ pajānanti khamantaṃ sammukhā mune. Catutthaṃ bhāṇavāraṃ. |168.364| Isi gahetvā pupphāni āgacchantaṃ mahāyasaṃ pūjesi janassa majjhe bodhitthāya mahāisiṃ. |168.365| Passitvā janassa majjhe dīpaṅkaramahāmuni viyākāsi mahāvīro isimuggatamānasaṃ. |168.366| Aparimeyye ito kappe dīpaṅkaramahāmuni mama kammaṃ viyākāsi ujubhāvaṃ mahāmuni. |168.367| Samacittā samakammā samakārī bhavissati piyā hessati kammena tuyhatthāya mahāise. |168.368| Sudassanā supiyā ca manāpā piyavādinī tassa dhammesu dāyādā viharissati iddhikā. |168.369| Yathāpi bhaṇḍasāmuggaṃ anurakkhanti sāmino evaṃ kusaladhammānaṃ anurakkhissate ayaṃ. |168.370| Tassa taṃ anukampanti pūrayissati pāramī sīhova pañjaraṃ hitvā pāpuṇissati bodhiyaṃ. Itthaṃ sudaṃ yasodharā bhikkhunī bhagavato sammukhā imā gāthāyo abhāsitthāti. Yasodharātheriyā apadānaṃ samattaṃ.