[170] |170.420| Aṭṭhārasasahassāni bhikkhunī sākiyasambhavā yasodharīpamukhāni sambuddhaṃ upasaṅkamuṃ. |170.421| Aṭṭhārasasahassāni sabbā honti mahiddhikā vandanti munino pāde ārocenti yathābalaṃ. |170.422| Jāti khīṇā jarā byādhi maraṇañca mahāmune anāsavaṃ padaṃ santaṃ amataṃ yāma nāyakaṃ . |170.423| Khalitañca pure atthi sabbāsampi mahāmuni aparādhaṃ pajānanti khama amhaṃ vināyaka. |170.424| Iddhiñcāpi nidassetha mama sāsanakārikā parisānañca sabbāsaṃ kaṅkhaṃ chindatha yāvatā. |170.425| Yasodharā mahāvīra manāpā piyadassanā Sabbā tuyhaṃ mahāvīra agārasmiṃ pajāpati. |170.426| Thīnaṃ satasahassānaṃ navutīnaṃ chaḷuttari agāre te mayaṃ vīra pāmokkhā sabbaissarā. |170.427| Rūpācāraguṇūpetā yobbanaṭṭhā piyaṃvadā sabbāyo apacāyanti devatā viya mānusā. |170.428| Aṭṭhārasasahassāni sabbā sākiyasambhavā yasodharī sahassāni pāmokkhā issarā tadā. |170.429| Kāmadhātumatikkantā saṇṭhitā rūpadhātuyā rūpena sadisā natthi sahassānaṃ mahāmune . |170.430| Sambuddhaṃ abhivādetvā iddhiṃ desesu satthuno nekā nānāvidhākārā mahāiddhīpi dassayuṃ. |170.431| Cakkavāḷasamaṃ kāyaṃ sīsaṃ uttarato kuru ubho pakkhā duve dīpā jambūdīpaṃ sarīrato. |170.432| Dakkhiṇañca saraṃ piṇchaṃ nānāsākhā tu pattakā candañca suriyañcakkhī merupabbatato sikhaṃ. |170.433| Cakkavāḷagiriṃ tuṇḍaṃ jambūrukkhaṃ samūlakaṃ vījamānā upāgantvā vandante lokanāyakaṃ. |170.434| Hatthivaṇṇaṃ tathevassaṃ pabbataṃ jalajantadā candañca suriyaṃ meruṃ sakkavaṇṇañca dassayuṃ. Itthaṃ sudaṃ yasodharāpamukhāni aṭṭhārasa bhikkhunīsahassāni bhagavato sammukhā imā gāthāyo abhāsitthāti. Aṭṭhārasatherīsahassānaṃ apadānaṃ samattaṃ. Uddānaṃ kuṇḍalā gotamī ceva dhammadinnā ca sakulā varanandā ca soṇā ca kāpilānī yasodharā. Dasasahassabhikkhunī aṭṭhārasasahassakā satāni ceva cattāri aṭṭhasattatimeva ca. Kuṇḍalakesavaggo tatiyo. ----------------------