[17] |17.1| Dhammadassissa aparena siddhattho lokanāyako nihantvāna tamaṃ sabbaṃ suriyo abbhuggato yathā. |17.2| Sopi patvāna sambodhiṃ santārento sadevakaṃ abhivassi dhammameghena nibbāpento sadevakaṃ. |17.3| Tassāpi atulatejassa ahesuṃ abhisamayā tayo koṭisatasahassānaṃ paṭhamābhisamayo ahu. |17.4| Punāparaṃ bhīmaraṭṭhe yadā āhani dundubhiṃ tadā navutikoṭīnaṃ dutiyābhisamayo ahu. |17.5| Yadā buddho dhammaṃ desesi vebhāre so naruttamo tadā navutikoṭīnaṃ tatiyābhisamayo ahu. |17.6| Sannipātā tayo āsuṃ siddhatthassa mahesino khīṇāsavānaṃ vimalānaṃ santacittāna tādinaṃ. Siddhatthabuddhavaṃso soḷasamo.