[14] |14.26| Punāparaṃ yadā homi cūḷabodhi susīlavā bhavaṃ disvāna bhayato nekkhammaṃ abhinikkhamiṃ. |14.27| Yā me dutiyikā āsi brāhmaṇī kanakasannibhā sāpi vaṭṭe anapekkhā nekkhammaṃ abhinikkhami. |14.28| Nirālayā chinnabandhu anapekkhā kule gaṇe carantā gāmanigamaṃ bārāṇasiṃ upāgamuṃ. |14.29| Tattha vasāma nipakā asaṃsaṭṭhā kule gaṇe nirākule appasadde rājuyyāne vasāmubho. |14.30| Uyyānadassanaṃ gantvā rājā addasa brāhmaṇiṃ upasaṅgamma maṃ pucchi tuyhesā kā kassa bhariyā. |14.31| Evaṃ vutte ahantassa idaṃ vacanamabraviṃ na mayhaṃ bhariyā esā sahadhammā ekasāsanī. |14.32| Tassā sāratta gadhito gāhāpetvāna ceṭake nippīḷayanto balasā antepuraṃ pavesayi. |14.33| Odapattikiyā mayhaṃ sahajātā ekasāsanī ākaḍḍhitvā nayantiyā kopo me uppajjatha. Cūḷabodhicariyaṃ catutthaṃ.