[23] |23.24| Punāparaṃ yadā homi kāsirājassa atrajo ayogharamhi saṃvaḍḍho nāmenāsiṃ ayogharo. |23.25| Dukkhena jīvito laddho sampīḷe patiposito ajjeva putta paṭipajja kevalaṃ vasundharaṃ imaṃ. |23.26| Saraṭṭhakaṃ sanigamaṃ sajanaṃ vanditvā khattiyaṃ añjaliṃ paggahetvāna idaṃ vacanamabraviṃ. |23.27| Ye keci mahiyā sattā hīnaukkaṭṭhamajjhimā nirārakkhā sake gehe vaḍḍhanti sakañātihi . |23.28| Idaṃ loke uttariyaṃ sampīḷe mama posanaṃ ayogharamhi saṃvaḍḍho appabhe candasuriye. |23.29| Pūtikuṇapasampuṇṇā muñcitvā mātu kucchito tato ghoratare dukkhe puna pakkhittayoghare. |23.30| Yadihaṃ tādisaṃ patvā dukkhaṃ paramadāruṇaṃ rajjesu yadi rañjāmi pāpānaṃ uttamo siyaṃ. |23.31| Ukkaṇṭhitomhi kāyena rajjenamhi anatthiko nibbutiṃ pariyesissaṃ yattha maṃ maccu na maddiye. |23.32| Evāhaṃ cintayitvāna vivarante mahājane nāgova bandhanaṃ chetvā pāvisiṃ kānanaṃ vanaṃ. Ayogharacariyaṃ tatiyaṃ.