[35] |35.120| Susāne seyyaṃ kappemi chavaṭṭhikaṃ upanidhāya gāmamaṇḍalā upāgantvā rūpaṃ dassenti nappakaṃ. |35.121| Apare gandhañca mālañca bhojanaṃ vividhaṃ bahuṃ upāyanāni upanenti haṭṭhā saṃviggamānasā. |35.122| Ye me dukkhaṃ upaharanti ye ca denti sukhaṃ mama sabbesaṃ samako homi dayā kopo na vijjati. |35.123| Sukhadukkhe tulābhūto yasesu ayasesu ca sabbattha samako homi esā me upekkhāpāramīti. Mahālomahaṃsacariyaṃ paṇṇarasamaṃ. Tassuddānaṃ yudhañjayo somanasso ayogharabhisena ca soṇanando mūgaphakkho kapirājā saccasavhayo. Vaṭṭako maccharājā ca kaṇhadīpāyano isi sutasomo pure āsi sāmo ca ekarājā ca upekkhāpāramī āsi iti vuttaṃ mahesinā. Evaṃ bahuvidhaṃ dukkhaṃ sampattiñca bahūvidhaṃ bhavābhave anubhavitvā patto sambodhimuttamaṃ. Datvā dātabbakaṃ dānaṃ sīlaṃ pūretvā asesato nikkhammapāramiṃ gantvā patto sambodhimuttamaṃ. Paṇḍite paripucchitvā viriyaṃ katvāna uttamaṃ khantiyā pāramiṃ gantvā patto sambodhimuttamaṃ. Katvā daḷhamadhiṭṭhānaṃ saccavācānurakkhiya mettāya pāramiṃ gantvā patto sambodhimuttamaṃ. Lābhālābhe yasāyase sammānanāvamānane sabbattha samako hutvā patto sambodhimuttamaṃ. Kosajjaṃ bhayato disvā viriyārambhañca khemato āraddhaviriyā hotha esā buddhānusāsanī . Vivādaṃ bhayato disvā avivādañca khemato samaggā sakhilā hotha esā buddhānusāsanī. Pamādaṃ bhayato disvā appamādañca khemato bhāvethaṭṭhaṅgikaṃ maggaṃ esā buddhānusāsanī. Itthaṃ sudaṃ bhagavā attano pubbacariyaṃ sambhāvayamāno buddhāpadāniyaṃ nāma dhammapariyāyaṃ abhāsitthāti. Cariyāpiṭakaṃ niṭṭhitaṃ. [1]-