[35] |35.31| Nigrodhe haritobhāse saṃvirūḷhamhi pādape ummāmālañhi paggayha bodhiyā abhiropayiṃ. |35.32| Imasmiṃyeva kappasmiṃ yaṃ bodhimabhipūjayiṃ duggatiṃ nābhijānāmi bodhipūjāyidaṃ phalaṃ. |35.33| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |35.34| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |35.35| Paṭipasambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā ummāpupphiyo thero imā gāthāyo abhāsitthāti. Ummāpupphiyattherassa apadānaṃ samattaṃ.