[39] |39.60| Padumuttarassa buddhassa bodhiyā pādaputtame vediyaṃ sukataṃ katvā sakaṃ cittaṃ pasādayiṃ. |39.61| Aggoḷārāni bhaṇḍāni katāni akatāni ca antalikkhā pavassanti vedikāya idaṃ phalaṃ. |39.62| Ubhato byuḷhasaṅgāme pakkhandanto bhayānake bhayabheravaṃ na passāmi vedikāya idaṃ phalaṃ. |39.63| Mama saṅkappamaññāya byamhaṃ nibbattate subhaṃ sayanāni mahagghāni vedikāya idaṃ phalaṃ. |39.64| Satasahasse ito kappe yaṃ vedikamakārayiṃ duggatiṃ nābhijānāmi vedikāya idaṃ phalaṃ. |39.65| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |39.66| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |39.67| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā vediyakārako thero imā gāthāyo abhāsitthāti. Vediyakārakattherassa apadānaṃ samattaṃ.