[69] |69.71| Anomadassī bhagavā lokajeṭṭho narāsabho divāvihārā nikkhamma vīthimāruyhi cakkhumā. |69.72| Pānadhiṃ sukataṃ gayha addhānaṃ paṭipajjahaṃ tatthaddasāsiṃ sambuddhaṃ pattikaṃ cārudassanaṃ. |69.73| Sakaṃ cittaṃ pasādetvā nīharitvāna pānadhiṃ pādamūle ṭhapetvāna idaṃ vacanamabraviṃ. |69.74| Abhirūha mahāvīra sugatinda vināyaka ito phalaṃ labhissāmi so me attho samijjhatu. |69.75| Anomadassī bhagavā lokajeṭṭho narāsabho pānadhiṃ abhirūhitvā idaṃ vacanamabravi. |69.76| Yo pānadhiṃ me adāsi pasanno sehi pāṇibhi tamahaṃ kittayissāmi suṇātha mama bhāsato. |69.77| Buddhassa giramaññāya sabbe devā samāgatā udaggacittā sumanā vedajātā katañjalī. |69.78| Pānadhimeva dānena sukhitoyaṃ bhavissati pañcapaññāsakkhattuñca devarajjaṃ karissati. |69.79| Sahassakkhattuṃ rājā ca cakkavatti bhavissati padesarajjaṃ vipulaṃ gaṇanāto asaṅkhayaṃ. |69.80| Aparimeyye ito kappe okkākakulasambhavo gotamo nāma nāmena satthā loke bhavissati. |69.81| Tassa dhammesu dāyādo oraso dhammanimmito sabbāsave pariññāya nibbāyissatināsavo. Itthaṃ sudaṃ āyasmā pānadhidāyako thero imā gāthāyo abhāsitthāti. Pānadhidāyakattherassa apadānaṃ samattaṃ.