[73] |73.27| Oggayhāhaṃ pokkharaṇiṃ nānākuñjarasevitaṃ uddharāmi bhisaṃ tattha asanahetu ahaṃ tadā. |73.28| Bhagavā tamhi samaye padumuttarasavhayo rattakambaladharo buddho gacchasi anilañjase. |73.29| Dhunanto paṃsukūlāni saddaṃ assosahaṃ tadā uddhaṃ nijjhāyamānohaṃ addasaṃ lokanāyakaṃ. |73.30| Tattheva ṭhitako santo āyāciṃ lokanāyakaṃ madhu bhiṃsehi savati khīrasappi muḷālibhi. |73.31| Paṭiggaṇhātu me buddho anukampāya cakkhumā tato kāruṇiko satthā orohitvā mahāyaso. |73.32| Paṭiggaṇhi mama bhikkhaṃ anukampāya cakkhumā paṭiggahetvā sambuddho akā me anumodanaṃ. Itthaṃ sudaṃ āyasmā bhisadāyako thero imā gāthāyo abhāsitthāti. Bhisadāyakattherassa apadānaṃ samattaṃ.