[9] |9.170| Vanacārī pure āsiṃ satataṃ vanakammiko patthodanaṃ gahetvāna kammantaṃ agamāsahaṃ. |9.171| Tatthaddasāsiṃ sambuddhaṃ sayambhuṃ aparājitaṃ vanā piṇḍāya nikkhantaṃ disvā cittaṃ pasādayiṃ. |9.172| Parakammāyane yutto puññañca me na vijjati ayaṃ patthodano atthi bhojayissāmimaṃ muniṃ. |9.173| Patthodanaṃ gahetvāna sayambhussa adāsahaṃ mama nijjhāyamānassa paribhuñji mahāmuni. |9.174| Tena kammena sukatena cetanāpaṇidhīhi ca jahitvā mānusaṃ dehaṃ tāvatiṃsaṃ agañchahaṃ. |9.175| Dvattiṃsakkhattuṃ devindo devarajjamakārayiṃ tettiṃsakkhattuṃ rājā ca cakkavatti bhavissati . |9.176| Padesarajjaṃ vipulaṃ gaṇanāto asaṅkhayaṃ sukhito yasavā homi patthodanassidaṃ phalaṃ. |9.177| Bhavābhave saṃsaranto labhāmi amitaṃ dhanaṃ bhoge me ūnatā natthi patthodanassidaṃ phalaṃ. Nadīsotapaṭibhāgā bhogā nibbattare mama parimetuṃ na sakkomi patthodanassidaṃ phalaṃ. Itthaṃ sudaṃ āyasmā patthodanadāyako thero imā gāthāyo abhāsitthāti. Patthodanadāyakattherassa apadānaṃ samattaṃ.