[588] Katamantaṃ rūpaṃ ajjhattikaṃ upādā cakkhāyatanaṃ .pe. Kāyāyatanaṃ idantaṃ rūpaṃ ajjhattikaṃ upādā . katamantaṃ rūpaṃ bāhiraṃ upādā rūpāyatanaṃ .pe. kabaḷiṃkāro āhāro idantaṃ rūpaṃ bāhiraṃ upādā . katamantaṃ rūpaṃ bāhiraṃ noupādā phoṭṭhabbāyatanaṃ Āpodhātu idantaṃ rūpaṃ bāhiraṃ noupādā.

[589] Katamantaṃ rūpaṃ ajjhattikaṃ upādinnaṃ cakkhāyatanaṃ .pe. Kāyāyatanaṃ idantaṃ rūpaṃ ajjhattikaṃ upādinnaṃ . katamantaṃ rūpaṃ bāhiraṃ upādinnaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ bāhiraṃ upādinnaṃ. {589.1} Katamantaṃ rūpaṃ bāhiraṃ anupādinnaṃ saddāyatanaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ bāhiraṃ anupādinnaṃ.

[590] Katamantaṃ rūpaṃ ajjhattikaṃ upādinnupādāniyaṃ cakkhāyatanaṃ .pe. kāyāyatanaṃ idantaṃ rūpaṃ ajjhattikaṃ upādinnupādāniyaṃ . Katamantaṃ rūpaṃ bāhiraṃ upādinnupādāniyaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ bāhiraṃ upādinnupādāniyaṃ. {590.1} Katamantaṃ rūpaṃ bāhiraṃ Anupādinnupādāniyaṃ saddāyatanaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa upacayo rūpassa santati kabaḷiṃkāro āhāro idantaṃ rūpaṃ bāhiraṃ anupādinnupādāniyaṃ.