[634] Katamantaṃ rūpaṃ upādā upādinnaṃ cakkhāyatanaṃ .pe. Kāyāyatanaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ ākāsadhātu rūpassa upacayo rūpassa santati kabaḷiṃkāro āhāro idantaṃ rūpaṃ upādā upādinnaṃ . katamantaṃ rūpaṃ upādā anupādinnaṃ saddāyatanaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ ākāsadhātu rūpassa upacayo rūpassa santati kabaḷiṃkāro āhāro idantaṃ rūpaṃ upādā anupādinnaṃ . katamantaṃ rūpaṃ noupādā upādinnaṃ kammassa katattā phoṭṭhabbāyatanaṃ āpodhātu Idantaṃ rūpaṃ noupādā upādinnaṃ . katamantaṃ rūpaṃ noupādā anupādinnaṃ na kammassa katattā phoṭṭhabbāyatanaṃ āpodhātu idantaṃ rūpaṃ noupādā anupādinnaṃ.

[635] Katamantaṃ rūpaṃ upādā upādinnupādāniyaṃ cakkhāyatanaṃ .pe. kāyāyatanaṃ itthindriyaṃ purisindriyaṃ jīvitindriyaṃ yaṃ vā panaññampi atthi rūpaṃ kammassa katattā rūpāyatanaṃ gandhāyatanaṃ rasāyatanaṃ ākāsadhātu rūpassa upacayo rūpassa santati kabaḷiṃkāro āhāro idantaṃ rūpaṃ upādā upādinnupādāniyaṃ . katamantaṃ rūpaṃ upādā anupādinnupādāniyaṃ saddāyatanaṃ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā yaṃ vā panaññampi atthi rūpaṃ na kammassa katattā rūpāyatanaṃ gandhāyatanaṃ rasāyatanaṃ ākāsadhātu rūpassa upacayo rūpassa santati kabaḷiṃkāro āhāro idantaṃ rūpaṃ upādā anupādinnupādāniyaṃ . katamantaṃ rūpaṃ noupādā upādinnupādāniyaṃ kammassa katattā phoṭṭhabbāyatanaṃ āpodhātu idantaṃ rūpaṃ noupādā upādinnupādāniyaṃ . katamantaṃ rūpaṃ noupādā anupādinnupādāniyaṃ na kammassa katattā phoṭṭhabbāyatanaṃ āpodhātu idantaṃ rūpaṃ noupādā anupādinnupādāniyaṃ.

[636] Katamantaṃ rūpaṃ upādā sappaṭighaṃ cakkhāyatanaṃ .pe. Rasāyatanaṃ idantaṃ rūpaṃ upādā sappaṭighaṃ . katamantaṃ rūpaṃ Upādā appaṭighaṃ itthindriyaṃ .pe. kabaḷiṃkāro āhāro idantaṃ rūpaṃ upādā appaṭighaṃ . katamantaṃ rūpaṃ noupādā sappaṭighaṃ phoṭṭhabbāyatanaṃ idantaṃ rūpaṃ noupādā sappaṭighaṃ . katamantaṃ rūpaṃ noupādā appaṭighaṃ āpodhātu idantaṃ rūpaṃ noupādā appaṭighaṃ.