[748] Katame dhammā nīvaraṇā cha nīvaraṇāni kāmacchandanīvaraṇaṃ byāpādanīvaraṇaṃ thīnamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ avijjānīvaraṇaṃ.

[749] Tattha katamaṃ kāmacchandanīvaraṇaṃ yo kāmesu kāmacchando kāmarāgo kāmanandī kāmataṇhā kāmasineho kāmapariḷāho kāmamucchā kāmajjhosānaṃ idaṃ vuccati kāmacchandanīvaraṇaṃ.

[750] Tattha katamaṃ byāpādanīvaraṇaṃ anatthaṃ me acarīti āghāto jāyati anatthaṃ me caratīti āghāto jāyati anatthaṃ me carissatīti āghāto jāyati piyassa me manāpassa anatthaṃ acari .pe. Anatthaṃ carati .pe. Anatthaṃ carissatīti āghāto jāyati appiyassa me amanāpassa atthaṃ acari .pe. Atthaṃ Carati .pe. atthaṃ carissatīti āghāto jāyati aṭṭhāne vā pana āghāto jāyati yo evarūpo cittassa āghāto paṭighāto paṭighaṃ paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṃ doso dūsanā dūsitattaṃ byāpatti byāpajjanā byāpajjitattaṃ virodho paṭivirodho caṇḍikkaṃ asuropo anattamanatā cittassa idaṃ vuccati byāpādanīvaraṇaṃ.

[751] Tattha katamaṃ thīnamiddhanīvaraṇaṃ atthi thīnaṃ atthi middhaṃ . Tattha katamaṃ thīnaṃ yā cittassa akalyatā akammaññatā olīyanā sallīyanā līnaṃ līyanā līyitattaṃ thīnaṃ thīyanā thīyitattaṃ cittassa idaṃ vuccati thīnaṃ . tattha katamaṃ middhaṃ yā kāyassa akalyatā akammaññatā onāho pariyonāho antosamorodho middhaṃ soppaṃ pacalāyikā soppaṃ supanā supitattaṃ idaṃ vuccati middhaṃ . iti idañca thīnaṃ idañca middhaṃ. Idaṃ vuccati thīnamiddhanīvaraṇaṃ.