[507] Pañcavidhena rūpasaṅgaho paṭhavīdhātu āpodhātu tejodhātu vāyodhātu yañca rūpaṃ upādā evaṃ pañcavidhena rūpasaṅgaho. Pañcakaṃ.

[508] Chabbidhena rūpasaṅgaho cakkhuviññeyyaṃ rūpaṃ sotaviññeyyaṃ rūpaṃ ghānaviññeyyaṃ rūpaṃ jivhāviññeyyaṃ rūpaṃ kāyaviññeyyaṃ rūpaṃ manoviññeyyaṃ rūpaṃ evaṃ chabbidhena rūpasaṅgaho. Chakkaṃ.

[509] Sattavidhena rūpasaṅgaho cakkhuviññeyyaṃ rūpaṃ sotaviññeyyaṃ rūpaṃ ghānaviññeyyaṃ rūpaṃ jivhāviññeyyaṃ rūpaṃ kāyaviññeyyaṃ rūpaṃ manodhātuviññeyyaṃ rūpaṃ manoviññāṇadhātuviññeyyaṃ rūpaṃ evaṃ sattavidhena rūpasaṅgaho. Sattakaṃ.

[510] Aṭṭhavidhena rūpasaṅgaho cakkhuviññeyyaṃ rūpaṃ sotaviññeyyaṃ rūpaṃ ghānaviññeyyaṃ rūpaṃ jivhāviññeyyaṃ rūpaṃ kāyaviññeyyaṃ rūpaṃ atthi sukhasamphassaṃ atthi dukkhasamphassaṃ manodhātuviññeyyaṃ rūpaṃ manoviññāṇa- dhātuviññeyyaṃ rūpaṃ evaṃ aṭṭhavidhena rūpasaṅgaho. Aṭṭhakaṃ.