[515] Katamantaṃ rūpaṃ upādā cakkhāyatanaṃ sotāyatanaṃ ghānāyatanaṃ jivhāyatanaṃ kāyāyatanaṃ rūpāyatanaṃ saddāyatanaṃ gandhāyatanaṃ rasāyatanaṃ itthindriyaṃ purisindriyaṃ jīvitindriyaṃ kāyaviññatti vacīviññatti ākāsadhātu rūpassa lahutā rūpassa mudutā rūpassa kammaññatā rūpassa upacayo rūpassa santati rūpassa jaratā rūpassa aniccatā kabaḷiṃkāro āhāro.

[516] Katamantaṃ rūpaṃ cakkhāyatanaṃ yaṃ cakkhuṃ catunnaṃ mahābhūtānaṃ upādāya pasādo attabhāvapariyāpanno anidassano sappaṭigho yena cakkhunā anidassanena sappaṭighena rūpaṃ sanidassanaṃ sappaṭighaṃ passi vā passati vā passissati vā passe vā cakkhuṃpetaṃ cakkhāyatanaṃpetaṃ cakkhudhātupesā cakkhundriyaṃpetaṃ lokopeso dvārāpesā samuddopeso paṇḍaraṃpetaṃ khettaṃpetaṃ vatthuṃpetaṃ nettaṃpetaṃ nayanaṃpetaṃ Orimantīraṃpetaṃ suñño gāmopeso idantaṃ rūpaṃ cakkhāyatanaṃ. {516.1} Katamantaṃ rūpaṃ cakkhāyatanaṃ yaṃ cakkhuṃ catunnaṃ mahābhūtānaṃ upādāya pasādo attabhāvapariyāpanno anidassano sappaṭigho yamhi cakkhumhi anidassanamhi sappaṭighamhi rūpaṃ sanidassanaṃ sappaṭighaṃ paṭihaññi vā paṭihaññati vā paṭihaññissati vā paṭihaññe vā cakkhuṃpetaṃ cakkhāyatanaṃpetaṃ cakkhudhātupesā cakkhundriyaṃpetaṃ lokopeso dvārāpesā samuddopeso paṇḍaraṃpetaṃ khettaṃpetaṃ vatthuṃpetaṃ nettaṃpetaṃ nayanaṃpetaṃ orimantīraṃpetaṃ suñño gāmopeso idantaṃ rūpaṃ cakkhāyatanaṃ. {516.2} Katamantaṃ rūpaṃ cakkhāyatanaṃ yaṃ cakkhuṃ catunnaṃ mahābhūtānaṃ upādāya pasādo attabhāvapariyāpanno anidassano sappaṭigho yaṃ cakkhuṃ anidassanaṃ sappaṭighaṃ rūpamhi sanidassanamhi sappaṭighamhi paṭihaññi vā paṭihaññati vā paṭihaññissati vā paṭihaññe vā cakkhuṃpetaṃ cakkhāyatanaṃpetaṃ cakkhudhātupesā cakkhundriyaṃpetaṃ lokopeso dvārāpesā samuddopeso paṇḍaraṃpetaṃ khettaṃpetaṃ vatthuṃpetaṃ nettaṃpetaṃ nayanaṃpetaṃ orimantīraṃpetaṃ suñño gāmopeso idantaṃ rūpaṃ cakkhāyatanaṃ. {516.3} Katamantaṃ rūpaṃ cakkhāyatanaṃ yaṃ cakkhuṃ catunnaṃ mahābhūtānaṃ upādāya pasādo attabhāvapariyāpanno anidassano sappaṭigho yaṃ cakkhuṃ nissāya rūpaṃ ārabbha cakkhusamphasso uppajji vā uppajjati vā uppajjissati vā uppajje vā .pe. yaṃ cakkhuṃ nissāya rūpaṃ ārabbha cakkhusamphassajā vedanā .pe. saññā .pe. cetanā .pe. Cakkhuviññāṇaṃ uppajji vā uppajjati vā uppajjissati vā uppajje vā .pe. yaṃ cakkhuṃ nissāya rūpārammaṇo cakkhusamphasso uppajji vā uppajjati vā uppajjissati vā uppajje vā .pe. yaṃ cakkhuṃ nissāya rūpārammaṇā cakkhusamphassajā vedanā .pe. saññā .pe. cetanā .pe. cakkhuviññāṇaṃ uppajji vā uppajjati vā uppajjissati vā uppajje vā cakkhuṃpetaṃ cakkhāyatanaṃpetaṃ cakkhudhātupesā cakkhundriyaṃpetaṃ lokopeso dvārāpesā samuddopeso paṇḍaraṃpetaṃ khettaṃpetaṃ vatthuṃpetaṃ nettaṃpetaṃ nayanaṃpetaṃ orimantīraṃpetaṃ suñño gāmopeso idantaṃ rūpaṃ cakkhāyatanaṃ.