[549] Katamantaṃ rūpaṃ cittasamuṭṭhānaṃ kāyaviññatti vacīviññatti Yaṃ vā panaññampi atthi rūpaṃ cittajaṃ cittahetukaṃ cittasamuṭṭhānaṃ rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa lahutā rūpassa mudutā rūpassa kammaññatā rūpassa upacayo rūpassa santati kabaḷiṃkāro āhāro idantaṃ rūpaṃ cittasamuṭṭhānaṃ . katamantaṃ rūpaṃ nacittasamuṭṭhānaṃ cakkhāyatanaṃ .pe. kāyāyatanaṃ itthindriyaṃ purisindriyaṃ jīvitindriyaṃ rūpassa jaratā rūpassa aniccatā yaṃ vā panaññampi atthi rūpaṃ na cittajaṃ na cittahetukaṃ na cittasamuṭṭhānaṃ rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa lahutā rūpassa mudutā rūpassa kammaññatā rūpassa upacayo rūpassa santati kabaḷiṃkāro āhāro idantaṃ rūpaṃ nacittasamuṭṭhānaṃ.

[550] Katamantaṃ rūpaṃ cittasahabhu kāyaviññatti vacīviññatti idantaṃ rūpaṃ cittasahabhu . katamantaṃ rūpaṃ nacittasahabhu cakkhāyatanaṃ .pe. Kabaḷiṃkāro āhāro idantaṃ rūpaṃ nacittasahabhu.

[551] Katamantaṃ rūpaṃ cittānuparivatti kāyaviññatti vacīviññatti idantaṃ rūpaṃ cittānuparivatti . katamantaṃ rūpaṃ nacittānuparivatti cakkhāyatanaṃ .pe. Kabaḷiṃkāro āhāro idantaṃ rūpaṃ nacittānuparivatti.

[552] Katamantaṃ rūpaṃ ajjhattikaṃ cakkhāyatanaṃ .pe. kāyāyatanaṃ idantaṃ rūpaṃ ajjhattikaṃ . katamantaṃ rūpaṃ bāhiraṃ rūpāyatanaṃ .pe. Kabaḷiṃkāro āhāro idantaṃ rūpaṃ bāhiraṃ.