[573] Katamantaṃ rūpaṃ itthindriyaṃ yaṃ itthiyā itthīliṅgaṃ itthīnimittaṃ itthīkuttaṃ itthākappo itthittaṃ itthībhāvo idantaṃ rūpaṃ itthindriyaṃ . katamantaṃ rūpaṃ naitthindriyaṃ cakkhāyatanaṃ .pe. Kabaḷiṃkāro āhāro idantaṃ rūpaṃ naitthindriyaṃ.

[574] Katamantaṃ rūpaṃ purisindriyaṃ yaṃ purisassa purisaliṅgaṃ purisanimittaṃ purisakuttaṃ purisākappo purisattaṃ purisabhāvo idantaṃ rūpaṃ purisindriyaṃ . katamantaṃ rūpaṃ napurisindriyaṃ cakkhāyatanaṃ .pe. Kabaḷiṃkāro āhāro idantaṃ rūpaṃ napurisindriyaṃ.

[575] Katamantaṃ rūpaṃ jīvitindriyaṃ yo tesaṃ rūpīnaṃ dhammānaṃ āyu ṭhiti yapanā yāpanā iriyanā vattanā pālanā jīvitaṃ jīvitindriyaṃ idantaṃ rūpaṃ jīvitindriyaṃ . katamantaṃ rūpaṃ najīvitindriyaṃ cakkhāyatanaṃ .pe. Kabaḷiṃkāro āhāro idantaṃ rūpaṃ najīvitindriyaṃ.

[576] Katamantaṃ rūpaṃ kāyaviññatti yā kusalacittassa vā akusalacittassa vā abyākatacittassa vā abhikkamantassa vā paṭikkamantassa vā ālokentassa vā vilokentassa vā sammiñjentassa Vā pasārentassa vā kāyassa thambhanā santhambhanā santhambhitattaṃ viññatti viññāpanā viññāpitattaṃ idantaṃ rūpaṃ kāyaviññatti . katamantaṃ rūpaṃ nakāyaviññatti cakkhāyatanaṃ .pe. Kabaḷiṃkāro āhāro idantaṃ rūpaṃ nakāyaviññatti.