[577] Katamantaṃ rūpaṃ vacīviññatti yā kusalacittassa vā akusalacittassa vā abyākatacittassa vā vācā girā byappatho udīraṇaṃ ghoso ghosakammaṃ vācā vacībhedo ayaṃ vuccati vācā yā tāya vācāya viññatti viññāpanā viññāpitattaṃ idantaṃ rūpaṃ vacīviññatti . katamantaṃ rūpaṃ navacīviññatti cakkhāyatanaṃ .pe. Kabaḷiṃkāro āhāro idantaṃ rūpaṃ navacīviññatti.

[578] Katamantaṃ rūpaṃ ākāsadhātu yo ākāso ākāsagataṃ aghaṃ aghagataṃ vivaro vivaragataṃ asamphuṭṭhaṃ catūhi mahābhūtehi idantaṃ rūpaṃ ākāsadhātu . katamantaṃ rūpaṃ naākāsadhātu cakkhāyatanaṃ .pe. Kabaḷiṃkāro āhāro idantaṃ rūpaṃ naākāsadhātu.

[579] Katamantaṃ rūpaṃ āpodhātu yaṃ āpo āpogataṃ sineho sinehagataṃ bandhanattaṃ rūpassa idantaṃ rūpaṃ āpodhātu . katamantaṃ rūpaṃ naāpodhātu cakkhāyatanaṃ .pe. kabaḷiṃkāro āhāro idantaṃ rūpaṃ naāpodhātu.

[580] Katamantaṃ rūpaṃ rūpassa lahutā yā rūpassa lahutā lahupariṇāmatā adandhanatā avitthanatā idantaṃ rūpaṃ rūpassa Lahutā . katamantaṃ rūpaṃ rūpassa nalahutā cakkhāyatanaṃ .pe. Kabaḷiṃkāro āhāro idantaṃ rūpaṃ rūpassa nalahutā.