[581] Katamantaṃ rūpaṃ rūpassa mudutā yā rūpassa mudutā maddavatā akakkhaḷatā akathinatā idantaṃ rūpaṃ rūpassa mudutā . Katamantaṃ rūpaṃ rūpassa namudutā cakkhāyatanaṃ .pe. kabaḷiṃkāro āhāro idantaṃ rūpaṃ rūpassa namudutā.

[582] Katamantaṃ rūpaṃ rūpassa kammaññatā yā rūpassa kammaññatā kammaññattaṃ kammaññabhāvo idantaṃ rūpaṃ rūpassa kammaññatā . katamantaṃ rūpaṃ rūpassa nakammaññatā cakkhāyatanaṃ .pe. Kabaḷiṃkāro āhāro idantaṃ rūpaṃ rūpassa nakammaññatā.

[583] Katamantaṃ rūpaṃ rūpassa upacayo yo āyatanānaṃ ācayo so rūpassa upacayo idantaṃ rūpaṃ rūpassa upacayo . katamantaṃ rūpaṃ rūpassa naupacayo cakkhāyatanaṃ .pe. kabaḷiṃkāro āhāro idantaṃ rūpaṃ rūpassa naupacayo.

[584] Katamantaṃ rūpaṃ rūpassa santati yo rūpassa upacayo sā rūpassa santati idantaṃ rūpaṃ rūpassa santati . katamantaṃ rūpaṃ rūpassa nasantati cakkhāyatanaṃ .pe. kabaḷiṃkāro āhāro idantaṃ rūpaṃ rūpassa nasantati.