[585] Katamantaṃ rūpaṃ rūpassa jaratā yā rūpassa jarā jīraṇatā khaṇḍiccaṃ pāliccaṃ valittacatā āyuno saṃhāni indriyānaṃ Paripāko idantaṃ rūpaṃ rūpassa jaratā . katamantaṃ rūpaṃ rūpassa najaratā cakkhāyatanaṃ .pe. kabaḷiṃkāro āhāro idantaṃ rūpaṃ rūpassa najaratā.

[586] Katamantaṃ rūpaṃ rūpassa aniccatā yo rūpassa khayo vayo bhedo paribhedo aniccatā antaradhānaṃ idantaṃ rūpaṃ rūpassa aniccatā . katamantaṃ rūpaṃ rūpassa naaniccatā cakkhāyatanaṃ .pe. Kabaḷiṃkāro āhāro idantaṃ rūpaṃ rūpassa naaniccatā.

[587] Katamantaṃ rūpaṃ kabaḷiṃkāro āhāro odano kummāso sattu maccho maṃsaṃ khīraṃ dadhi sappi navanītaṃ telaṃ madhu phāṇitaṃ yaṃ vā panaññampi atthi rūpaṃ yamhi yamhi janapade tesaṃ tesaṃ sattānaṃ mukhāsiyaṃ dantavikhādanaṃ galajjhoharaṇīyaṃ kucchivitthambhanaṃ yāya ojāya sattā yāpenti idantaṃ rūpaṃ kabaḷiṃkāro āhāro . Katamantaṃ rūpaṃ na kabaḷiṃkāro āhāro cakkhāyatanaṃ .pe. rūpassa aniccatā idantaṃ rūpaṃ na kabaḷiṃkāro āhāro. Evaṃ duvidhena rūpasaṅgaho. Dukaniddeso niṭṭhito.